Putin-a'n sipai nuai 1.6 lak belh dawn

Russia president Vladimir Putin chuan an ram sipai tih len zel tumin, kum 18-30 inkar mi nuai 1.6 lak belh an ni dawn tih a sawi. Hei hi kum 2011 hnua sipai lak thar tam ber ṭum tur a ni.

President Putin hian a hmain an ram sipai service lai mtd 1.5 awm mek chu mtd 2.39 ah tih pun a ni dawn tih pawh a lo sawi lang tawh a ni. Ukraine nena an indo hnuah, Russia hian sipai atan lak theih chin kum bithliah, a sang lamah kum 27 tih chu kum 30 ah a pung chho tawh. Kum 2022 February thlaa Ukraine an run hnuah Russia hian sipai lak runpui hi ṭum thum a nei tawh bawk.

Vice admiral Vladimir Tsimlyansky chuan sipai lak tharte hi Russia-in Ukraine-a beihpui a thlaknaah tirh an ni dawn lo tih a sawi. Hetih lai hian a hmaa sipai lak tharte chu Russia ramri, indona hmunah tirh an ni tho niin a sawi a ni thung.

US-in Russia-Ukraine indo na thleng meka inkahhai puan a nih theihna turin hma la mah se, ram pahnihte hi an la inbei chhunzawm reng a ni. Thawhlehni kan Russia chuan Ukraine chhim lam, Kherson khuaa power facility a bei leh a, hei vang hian mi 45,000 vel chu power supply nei loin an awm phah niin Ukraine chuan a sawi.

Indonaah hian Russia chuan a sipai nuai khat chuang a chan tawh niin BBC leh Mediazona chuan an tarlang a, hei hi Russia lam chuan a la chhang lo.