Israel PM-in security chief atana a ruat a sut leh

Israel prime minister Benjamin Netanyahu chuan an ram security agency, Shin Bet hotu thar atana navy commander hlui, vice admiral Eli Sharvit a ruatna chu a sut leh.

Prime Minister Netanyahu hian Shin Bet hotu Ronen Bar a ban hnuah, March 31 khan a thlaktu atan hian Sharvit ruat a nih thu hi a puang a ni. Mahse Bar ban a nihna hi Supreme Court-ah petition theh luh a nih avangin dan sak a a ni a, Sharvit-a'n a hna thar a chelh hun tur pawh sawi chian a la ni lo.

Hetih lai hian Shin Bet hotu thar ruat chungchang hian sawisel a tawk nasa hle a, sawiseltu zingah hian Israel ṭhianṭha US pawh a tel. Hei bakah Sharvit hi kum 2023-a Netanyahu kaihhruai sorkarin judiciary kalphung siamṭhat a tumna do dal a, nawrh huaihawtnaah pawh a tel ṭhin thute sawilan a ni zui bawk. Israel media-te chuan Sharvit hi kum 2022-a Lebanon nena maritime border agreement siam thlawptu a nih thu an sawi bawk a, he inremna hi Netanyahu chuan a dodal thung a ni.

Hemi hnu hian Netanyahu chuan Shin Bet hotu thar atana Sharvit ruat a nihna chu sut lehin, candidate dangte an zirchiang leh phawt dawn tih a sawi. A thutlukna a thlak leh mai chungchangah eptu lam chuan na takin an sawisel zui a, he dinhmun hi dinhmun pawimawh tak, ṭhenkhat sawiselna avanga thutlukna thlak leh zung zung mai na chi a ni a ni lo, an ti.