Russia beihpui thlakna vangin mi 9,300 thi tawh

Syria President Bashar al-Assad-a thlawpa Russia-in Syria helte lakah beihpui a thlaknaah mi 9,300 an thi tawh a, an zinga hian civil mi 3,800 an tel niin monitoring group, Syrian Obervatory for Human Rights chuan a sawi.

Russia beihpui thlaknaa thi zingah hian Islamic State (IS) firfiak pawl leh helpawl dang mi leh sa 5,500 zet an tel. Nikum September 30 aṭang khan Russia hian Syria ram chhungah helte laka beihpui a thlak ṭan a ni. Syria eptu pawlte chuan tunhnaiah Russia hian Aleppo khaw hmar lam beiin, civil mi 200 chuang an tihlum niin an puh.