Syria-ah Aleppo hospital bomb leh

Syria ram khawchhak lama helho kuta awm mek, Aleppo khuaa Syria leh Russia sipaiten beihpui an thlaknaah hospital bomb fuh leh a ni.

Aleppo biala hospital lian ber dawttu, M10 hospital hi kar kalta Inrinni khan bomb pahnihin a fuh niin hospital enkawltu, Syrian American Medical Society (SAMS) chuan a tarlang. United Nations Secretary General Ban Ki-moon chuan he thil thleng hi a dem thu sawiin, pawikhawihna dik tak a ni, a ti.

Syrian Observatory for Human Rights chuan hospital beihnaah hian damlo enkawl lai pahnih an thi a, midang 10 velin hliam an tuar. Hospital beih lai hian damlo enkawl lai 60 vel an awm a, damlo-te hi clinic dangah sawn nghal an ni. Hospital building hi a chhe nasa hle a, hman zui tlak a ni rih lo nia sawi a ni.

Aleppo khua hi Syria sorkar laka helte kutah a awm mek a, sipaiten lak let tumin an bei reng an ni. Aleppo khawchhak lam district-ah mi nuai thum vel an tangkhang mek a, an zingah hian naupang nuai khat vel an awm bawk. Civil defence worker-te chuan hel leh sipaite inbeihan avang hian kar kalta chhung khan ṭum 1,900 zet bomb a puak tih a sawi. Syria sipaite thlawpin Russia chuan beihpui a thlakpui bawk a ni.

Syria sorkar leh helhoten inkahhai thuthlung an puan a tawp hnuah Syria leh Russia sipaite chuan helho lakah ngawrh takin beihpui an thlak chhunzawm leh nghal. UN chuan an beihpui thlakna avang hian kar kalta chhung khan civil mi 400 an thi niin a sawi a, an zingah hian naupang tam tak an tel a ni, a ti.

Syria sipaite chuan Aleppo lak let tuma an beihnaah hma an sawn zel niin an sawi a, mahse hei hi helpawl chuan a dik lo niin an sawi thung. Sipaite chuan an mi tam tak an chan tawh zawk a ni, an ti.

Syria sorkar thlawptu, Russia leh sorkar laka helte thlawptu, US pawh ṭawngkamin a inbei reng bawk. Russia chuan US hian Syria President Bashar al-Assad paihthlak a duh luat vangin firfiak pawlte a hum phah niin a sawi a, mahse US chuan Russia puihna chu thil awm lo tak niin a sawi.

Kum 2011, March thlaa tualchhung buaina chhuak vang hian mi nuai li chuang an thi tawh a, mi maktaduai 4.8 vel chu ram pawn lamah himna zawngin an tlanchhe tawh bawk. Ramchhungah pawh indona avanga hmun danga tlanchhia hi mi maktaduai 6.5 vel an awm a ni.