Hungary mipuiten vote an thlak

Hungary mipuite chuan European Union-in Europe ram hrang hranga raltlante semrualna tur ruahmanna a siam chungchangah nimin khan vote an thlak. EU ruahmanna siam hi Prime Minister Viktor Orban chuan a dodal a ni.

EU hian raltlan 1,60,000 te chu Europe ram hrang hrangah hian sem rual a tum a, mahse ram eng emaw zatin he ruahmanna hi an duh lo. PM chuan an ram sorkar ruahmanna siamah chuan raltlan mi 1,294 chauh lakluh an tum niin a sawi.

Vote thlak hmaa mipui ngaihdan lakah pawh a tam zawkin raltlan dah luh tur hi an duh lo a, mahse nimina vote thlak hi 50% an tlin loh chuan result hi pawm theih a ni lo ang.

Mipuite hnenah hian, "European Union-in National Assembly remtihna tel loa Hungary mi ni lo, Hungary rama dah luh a tum hi pawm em?' tih zawhna pek an ni a, Aw leh Aih tiin duhthlan tur pek an ni.

EU ruahmanna siamah hian Greece leh Italy rama raltlan leh pem lut tam lutuk chu Europe ram dangah sawnchhuakin semrual tum a ni a, mahse hi EU khaw≠chhak leh ram laili laia awmte chuan an duh lo a ni. Kum 2015 khan raltlan nuai li dawn chuan Hungary hi an paltlang hman a, raltlan an pun chak avangin sorkar chuan ramri-ah khuahkhirhna siamin a ram chhim lam chu a hung a ni.