Khawvel lawrkhawm

Trump-a hotel bang ziah rân sak

US Republican party president candidate, Donald Trump-a hotel, Washington-a mi chu, Pathianni tlai khan a bang ziahran sak a ni.

Columbia district police-te chuan hotel building hma lamah hian mihangte thlavang hauhsakna, 'black lives matter' tih thu leh 'no justice no peace' tih chu rawngin an lo kap a, he thil titu hi hriat a la ni lo. Trump International Hotel hi September 12 khan hawn a ni a, Pennsylvania Avenue-a hotel hmun hi Old Post Office building ṭhin niin, Trump Organization chuan sorkar hnen aṭangin kum 60 chhung hman phalna a nei a ni.

Thailand-in naupai lai Zika test a neihtir vek dawn

Thailand ramah kar kalta khan Zika virus-in a thlen, naupiang thar pianphung dik lo hmuh a nih avangin an rama naupai lai zawng zawng chu Zika virust test neihtir vek a tum. Nuin a nau pai laia Zika virus a kai chuan naute hi pianphung pangngai aia lu leh thluak te zawk, microcephaly an nei thei a ni.

Health Ministry chuan kar kalta khan microcephaly nei naute pahnih piang an awm thu a sawi. Kumin January thla aṭang khan Thailand-ah hian Zika vei mi 392 hmuh an nih tawh a, an zingah hian naupai lai 39 an tel a ni.

Taliban-te Kunduz khuaah an lut

Afghanitan-a Taliban firfiakte chuan an ram hmarlam Kunduz khua chu hmun li aṭanga beiin nimin zing khan khaw chhungah an lut. Police-te chuan firfiakte hian Pathianni zan aṭang khan Kunduz khua hi an bei ṭan tih sawiin, nimin thleng khan security force-te nen an la inbei chhunzawm reng tih an sawi.

Kunduz khua hi Tajikistan ramri bula awm niin, inkalpawhna kawng pawimawh tak a ni. Kum 2015, September thla khan firfiakte hian Kunduz hi an la tawh a, mahse kumin April thla khan Afghanistan sipaite chuan US sipaite puihnain khawpui aṭang hian firfiakte hi an umchhuak a ni.