Colombia mipuiten FARC hel nena inremna pawm lo

Colombia sorkar leh FARC helten inremna thuthlung an siam chungchangah Pathianni khan ram mipuite ngaihdan lak a ni a, mahse Colombia mipuite chuan FARC nena inremna ziah hi an pawmpui lo.

FARC ho hi kum 50 chuang zet an hel hnuah inremna siampui tumi sorkar chuan a bia a, kum li dawn an inbiak hnuah sorkar leh helpawl aiawhte hian kar kalta khan Cuba khawpuiah inremna hi an ziak a, President Juan Manuel Santos leh FARC hruaitu Timoleon Jimenez-te'n hming an ziahhnan a ni. Mahse inremna hi a taka hmang tur chuan an ram mipuiten an pawmpui ve leh phawt a ngai a ni.

Pathianni-a mipui ngaihdan lakah, FARC nena inremna siam duh lotu hi 50.24% awmin inremna thlawptu lamah vote 49.8% a tla a, a inthlauhna hi vote 60,000 a tling lo. President Santos chuan mipuite duhthlanna chu a pawm thu a sawi a, hemi rual hian an ramah remna leh muanna a awm theihna turin a bei chhunzawm zel dawn tih a sawi. Mipuite duhthlanna hi hriattir a, hma lak chhunzawm zel dan tur chungchanga FARC hruaitute berawn turin Cuba ramah hian a aiawhte a tir nghal bawk.

FARC hruaitu Timochenko pawhin an pawl chuan tualchhung indo a tawp chu an duh reng tih a sawi.

Inremna thuthlung an siamah hian FARC te chuan kum 52 chhung sorkar lakah an hel hnuah an helna titawp a, an ralthuamte dah thlak an remti a, an pawl chu political party anga awm zui tura tih a ni. Mahse mi tam tak chuan helpawlte inremna a siampui danah sorkar chu a nem lutuk nia an ngaih thu an sawi.

FARC inremna siampui a nih dan duh lotu zingah hian President hlui Alvaro Uribe pawh a tel a, Colombia mipuite chuan remna leh muanna a awm chu an duh vek a, mahse inremna thuthlung ziah a nih dan chu siamṭhat a ngai a ni, a ti.