Duterte-a'n US nena inremna siam ennawn dawn

Philippines President Rodrigo Duterte chuan defence lama US nena inremna an lo siam tawh, 2014 Enhanced Defence Cooperation Agreement (EDCA) chu a ennawn dawn tih a sawi.

Pathianni-a Balocod City-a festival a hmanpuinaah Duterte chuan he thu hi a sawi a ni. Duterte chuan, "He inremna siam hi official document chu a ni ngei a, mahse President aiawh, Defence Secretary hlui, Voltaire Gazmin-a'n hming a ziak tih America chuan hria se ka duh a ni. Inremna siam laia Philippines President Benigno Aquino signature pawh a awm lo a ni", a ti.

President signature hi a awm lo a nih chuan he inremna siam tawh aṭang hian an ram chu a inlachhuak dawn tih a sawi nghal bawk. Sawiseltu ṭhenkhatin US nena inremna siam tihtawp a nih chuan, Philippines-a American sumdawng ṭhenkhatte an inhnukdawk duh mai dawn nia an sawi chu chhangin, Philippines President chuan, " Rilṭamin kan awm ngai lo ang tih America chu ka hriattir duh a ni" a ti.