Ethiopia-a innek buainaah mi 52 thi

Ethiopia ramah Pathianni khan festival lawmna hmunah inpawng nekna thlengin, mi 52 an thi.

Ethiopia khawpui, Addis Ababa bula Bishoftu khuaa Lake Harsadi kama Irreecha (thanksgiving) festival lawmna hmunah kalkhawmte zingah police-te chetdan duh loh vangin buaina a chhuak a ni.

Festival lawmaa pungkhawmte chu police-te hian tear gas in an phuh a, hei vang hian mipui thinrim chuan police-te chu lung leh bur ten an bei leh a ni. Security force-te hian tear gas an hman bakah silai pawh an hmetpuak nia sawi a ni. Police-te chetdan hlau avanga mipui tlanchhiate chu an innek buai zui ta a ni.

Activist-te chuan police-te chetdanah lungawi loin, anmahni avanga mi tam tak thihna a thlen avangin ni nga chhung lungawi lohna lantir an tum thu an sawi. Sorkar chu mipuite chunga inluling lutuk leh Oromo bial mite chu an duh ang sawi tura zalenna pawh pe duh lohah an puh.

Kum tinin Oromo bial mipuite hian Lake Harsadi lui kamah Irreecha festival hi an hmang ziah a, sakhaw hun pawimawh takah an ngai a ni. Oromo mipuite chuan kum 25 chhung chu sorkarin a enhrang tawh niin an sawi a, nikum
aṭang khan sorkar laka lungawi lohna hi an lo lantir tawh a ni. Festival neihna hmunah pawh hian zalenna an duh thu te an aupui a, mipuite thunun tuma police-te chet dan chu duh loin buaina hi a chhuak ta a ni.