Israel sorkar thar siam thei tur la awm lo
Israel ram inthlanpui, March 2-a neih a nih hnuah party mala sorkarna siam thei an awm lo a, tun thlengin ṭangrual sorkar pawh a la ding thei lo.
Blue and White party hruaitu Benny Gantz chu sorkar siam tura kar li hun pek a nih hnuin nimin khan a hun neih a zo a, president Reuven Rivlin hnena hun pek belh tura a ngenna chu President hian a hnawlsak a ni.
Likud party hruaitu leh prime minister dinhmun chelh mektu, Benjamin Netanyahu nen thuneihna insem a, ṭangrual sorkar din dan an ngaihtuah nia sawi ni mah se, hun pek chhungin inremna an siam thei ta lo a ni.
President Rivlin chuan Gantz hian ṭangrual sorkar a siam theih dawn tak loh vangin Parliament, Knesset hnenah prime minister candidate hi nominate turin a hrilh ang. Knesset member-ten PM candidate tura an rawt hian ṭangrual sorkar siam dan ngaihtuahin party-te inbiakna a neihpui ve leh ang.