Saudi Arabia-in dan bawhchhia mi 18,000 chuang man

Saudi Arabia chuan June 4-9 chhunga Muslim hun pawimawh, Hajj 2025 atana an inbuatsaihna kal mekah,dan bawhchhia 18,407 an man tawh. An mi mante hi thiam loh chanter an nih chuan kum 15 thleng lung-in tan tir theih an ni ang.

Man zinga 12,995 hi residency law bawhchhia niin, dan loa ramri kana lut 3,512 bakah labour law bawhchhia 1,900 an tel a ni. 66% hi Ethiopia mi niin, Yemen aṭanga kal 28% an awm bawk.

Ministry of interior chuan dan loa an rama lutte puitu pawh kum 15 thleng tantir bakah, SR mtd 1 chawitirin, an motor leh thil neih dangte pawh hrensak theih an nih thu a tarlang.

Thuneitute chuan mipuite chu dan bawhchhiate chu hriattir nghal zel turin an chah a, an ram himna leh dan kenkawh a nih theihna turin khauh takin hma an la zel dawn tih an sawi. Crown Prince Mohammed bin Salman pawhin Hajj chu boruak ṭha leh felfai taka hman a nih theihna turin visa endik hna pawh uluk hle turin a chah.

Hajj hmang tura permit nei loa Mecca lutte chu Saudi Arabia mi leh sa ngei pawh ni se, SR 10,000 zel chawitir an ni ang. Hei hian sakhaw hmun pawimawh - Grand Mosque area, Mina, Arafat, Mkuzdalifah bakah checkpoint te pawh a huam dawn a ni.