US-in Russia nena inbiakna titawp

US chuan Syria rama inkahhai puan chungchanga Russia nen inbiakna an neih mek chu a titawp. Inkahhai an lo puan tawh chu tihhlawhtlin a nih theihna tura hma la tha tawk loah Russia a puh.

US State Department thupuangtu John Kirby chuan thuchhuah siamin, Russia nena inbiakna tihtawp a nih thu hi a sawi. Syria rama sorkar leh sorkar laka helte inkarah inremna a awm theihna tura hmalakna chu tihbahlahah Syria sorkar leh Russia chu a puh. "Syria leh Russia sorkar chuan sipai chakna hman an duh zawk a, civil mite chenna bialah beihpui an thlak chhunzawm zawk a ni", a ti.

Hei vang hian Syria rama, kum nga leh chanve vel tualchhung indona thleng tawh chu chinfel mai theih a la ni dawn lo niin a lang. Kar hmasa khan US Secretary of State John Kerry chuan Russia-in Aleppo bial a beih chhunzawm zel chuan, inbiakna tihtawpah a lo vau tawh a ni.

Hetihlai hian Russia Foreign Ministry thupuangtu, Maria Zakharova chuan, Syria rama buaina thlen chhanah US chu a puh a, mahse US chuan an ram chu mawhphurtua puh a tum zawk a ni, a ti.

Hemi hma hian Russia President Vladmir Putin chuan weapon-grade plutonium tihralna tura US nena nuclear security deal an lo siam tawh chu a sut bawk. Ram pahnihte hian kum 2000 khan inremna hi an siam a ni. Mahse Putin hian Syria chungchanga Russia laka US chetdana a lungawi loh avangin inremna siam hi a titawp ta nia sawi a ni.