Estonia President atan Kaljulaid-i thlang tling

Estonia Parliament, Riigikogu chuan an ram president atan Kersti Kaljulaid-i an thlang a, Estonia hmeichhe president hmasa ber a ni dawn a ni.

Parliament-a vote lakah MP 101-te'n vote thlakin, President atana Kaljulaid-i duhtu hi MP 81 an awm.

European Court of Auditors member hlui, Kaljualid-i hi party mal candidate a ni lo. Vawi eng emaw zat president thlanna hi a hlawhchham hnuah party hrang hrangten lungrual takin candidate atan an rawt a ni.

August leh September thla khan President hi thlan a ni tawh a, mahse candidate zingah President atana tling tura vote hmuh ngai zat hmu pha an awm thei lo. Tling tur hian MP 68 vote hmuh a ngai a ni.

Estonia President atana thlan, Kersti Kaljulaid-i hi kum 46 mi a ni a, University of Taru aṭangin biology-ah degree a nei a, a hnuah he university
aṭang vek hian MBA in business managment a zo leh a ni. A thluak
ṭhat leh hna thiam avangin kum 1999 khan Prime Minister economic advisor atan ruat a ni a, he hna hi kum thum chhung a chelh. Kum 2002 khan Iru Power Plant director atan dah a ni a, hmeichhe zingah he hna chelh thei hmasa ber a ni.