Duterte-a'n ṭawngkam mawi lo takin Obama bei leh

Philippines President Rodrigo Duterte chuan US President Barack Obama chu ṭawngkam chhe taka a koh hnuah, Thawhlehnia a thusawinaah thi rawh tih tluk tawngkam hmangin a bei leh.

President Duterte-a kaihhruai sorkarin Philippines rama ruihhlo do beihpui a thlak mek chungchang chu ram hrang hrangten an sawisel fo a, president hian sawiseltute hi ṭawngkam na tak takin a chhang let a ni. Dan loa damdawi zuar leh ruihhlo zuarte laka beihpui thlaknaah hian thla thum chhungin mi 3,000 chuang tihhlum an ni tawh.

Duterte chuan US in a thiltih dan a sawisel fo chu a lungawi lo hle tih sawiin, "Kan hmalaknaa min puih aiin, min sawi≠seltu hmasa ber chu State Department hi a ni. Obama, hremhmunah i kal thei ang", tiin a sawi. US chuan ralthuam ṭhenkhat a lei tir duh lo a, mahse Russia leh China-te chuan supply an duh reng tih sawiin pawi a tih loh thu a sawi bawk. US-Philippines Enhanced Defence Cooperation Agreement an lo siam tawh pawh ennawn a tum thu Duterte hian a lo sawi tawh a ni.

"Ralthuam min lei tir duh lo a nih chuan Russia kan pan mai ang. General-te pawh Russia-ah ka tir tawh a, anni chuan lo lung≠ngai lo turin min hrilh a, kan mamawh ang chu engkim an neih thu min hrilh a ni", a ti. China pawhin ralthuam supply tur chuan an rama kal a, inremna ziak fel mai turin a hrilh bawk niin a sawi.

Hetih lai hian US chuan Philippines nena an thawhdunna leh inzawmna chu a la danglam lo tih a sawi. White House thupuangtu Josh Earnest chuan, "Philippines hnen aṭang hian kan inzawmna siam danglam a nih dan tur chungchang thu engmah kan la dawng lo", a ti.