WikiLeaks founder-in US thuruk puanzar leh a tiam

US thuruk tam tak lo puanzar sak tawhtu, WikiLeaks dintu Julian Assange chuan US president thlan kaihhnawih leh sorkar khawih thil document tam tham tak puanzar sak leh a tum tih a sawi.

Julian Assange chuan document-te hi kummin kumtawp hmaa tihchhuah vek a tum thu sawiin, kar reilote hnuah mipui hmuh theih tura tihchhuah a ni dawn tih a sawi. Inthlan kaihhnawih thilte a awm avangin November 8-a US President thlan hma ngeiin tihchhuah hman a tum tih a sawi bawk.

Assange hian WikiLeaks-in Democratic National Committee kaihhnawih thil an tihchhuah hnuah, Democratic president candidate Hillary Clinton-i'n ramhuai thiltih ni ang hial a sawi sak avangin, Clinton-i hi na takin a lo sawisel tawh a ni. Mahse document tihchhuah an tum chu Clinton-i tihchhiat tumna a nih loh thu a sawi.

Hetih lai hian Republican candidate, Donald Trump-a lam chuan WiliLeaks document tihchhuah hian November inthlan neih turah hian an dinhmun a siamṭhat phah an beisei hle thung.

Kum 2010 khan WikiLeaks chuan US-in Afghanistan-a beihpui a thlak chungchang document pawimawh 90,000 zet a lo tihchhuah sak tawh a, hemi hnu hian Iraq-a US military report 400,000 vel a tichhuak tawh bawk.