Israel-in security zone-ah Rafah telh a tum

Israel defence minister Israel Katz chuan Gaza Strip-a security zone an siam chu tih zauh an tum thu leh, Gaza chhim lam khawpui Rafah chu telh tum a nih thu a sawi.

Katz chuan Israel sipaiten Gaza-a Hamas chu an mi hren mekte chhuah tura nawr turin an dang chep chho zel tih a sawi. Gaza ramri hrula ramte chu sipaite hian la vek tawhih, heng hmunte hi Hamas lamin an beih tur venna atan buffer zone-ah an puang bawk.

Inkahhai thawh khatna an hman zawh hnuah Israel sipaiten March 18 aṭang khan Hamas lakah beihpui an thlak thar leh a, Gaza Strip hmun thuma ṭhena hmun hnih dawn chu 'no-go' zone ah puangin, heng hmuna chengte chu hmun danga insawnchhuak turin an lo hriattir tawh a ni. He thupek an tih chhuah hnuah hian Palestinian nuai 3.9 ve chu an insawnchhuak leh tawh nia sawi a ni. Israel chuan civil mite hi inbeihna thleng laka an himna atan leh, Hamas in inphenna atana an hman tur venna atan insawnchhuak tura ti an nih thu a tarlang.

Israel Defence Minister chuan, "Hamas hian an mi hren mekte an chhuah duh loh a nih chuan, Israel Defence Force (IDF) chuan Gaza pumpuiah nasa zawkin beihpui an thlak leh dawn a ni," a ti. Ningani pawh khan sipaite hian Rafah huamchhung leh Morag corridor an ei leh a, firfiak eng emaw zat ti hlumin, an infrastructure te pawh an ti chhiat sak tih an sawi.