Serbia sorkar thlawptute an pungkhawm

Serbia president Alekzandar Vucic leh a kaihhruai sorkar thlawptute chu Inrinni liam ta khan an ram khawpui, Belgrade ah pungkhawmin kawng an zawh. Pungkhawm hi mi 55,000 vel an tling niin an sawi.

Serbia-ah hian rel station chung chim vanga mi 16 thihna a thlen hnuah, sorkar chuan inthlahdah leh eirua puhna a awm chho a, eptu lamten eiruk duh lohna lantirin, sorkar laka lungawi lohna an lo lantir chhunzawm ta a ni. March 15-a sorkar duh lohna lantira kawngzawh huaihawtah mi nuai khat vel an tel a, an ram chanchina hun rei tak chhunga nawrh huaihawt lian ber a tling a ni. Lungawi lohna lantirnaah hian zirlai, zirtirtu leh loneitu lamte pawh an tel.

Eptute chhan letna atan sorkar thlawptu lam hian kawngzawh hi an huaihawt nia ngaih a ni. He kawngzawh hi President Vucic-a party, Serbian Progressive Party (SNS) hma lakna tur thar chawi larna atana tih a ni bawk. SNS hian ṭangrual sorkar an siam mekah party dang telh a tum a, mahse an lak luh hun tur tak erawh an la sawichiang lo. Kawngzawhnaa tel tur hian Serbia ram chhung hmun hrang hrang aṭang leh, Kosovo leh Bosnia aṭangtein an kal khawm a ni.

President Vucic chuan sorkar laka lungawi lohna lantira nawrh huaihawt chungchangah ram dangte inrawlhah puhin, an rama boruak zalen leh ram dang rinchhan loa an inrelbawlna chu an hmu thei lo niin a sawi.