South Africa-in Nobel laureate thih dan chhui ṭha dawn

South Africa chuan kum 1967-a vun rawng inthliarna duh lotu leh hemi kawnga campaigner langsar, Nobel Peace Prize pawh lo dawng tawh, Chief Albert Luthuli thih dan chu a chhui ṭha leh dawn.

Kum 1967-a a thih dan an sawiah chuan Chief Albert Luthuli hi rel kawngah a kal laiin relin a su a, a lu ruh kehin a thi niin an sawi. Mahse activist leh a chhungte chuan official report hi an rinhlelh thu an lo sawi fo tawh a ni. Luthuli hi he thil thlen lai hian African National Congress (ANC) hotu a ni. Vun rawng avanga inthiarna duh lohna lantir leh, a beihletna avang hian kum 1960 khan chawimawina ngaihhlut, Nobel Peace Prize pawh a lo dawng tawh a ni. ANC hian South Africa-a hnam tlem zawk, vun ngo rorelna hnuaia an awm chu do let zelin, kum 1994 khan a vawi khatna atana democracy kalphunga inthlan huaihawt a nih hnuah thuneihna an rawn chang ta a ni.

Luthuli-a tupa, Albert Mthunzi Luthuli chuan a pu thih dan chhui chian a ni leh tur chu an chhungkua pawhin lawmawm an tih thu a sawi a, a pu thihna chu kum tam tak liam ta nimahse tun thlengin a pu thah a nihnaa ihnamhnawiha rinhlelh mi tam tak an neih thu a sawi. A thih dan dik tak pawh chhui chhuah a nih ngei an beisei tih a tarlang.