UN Secretary General thar tur Portugal PM hlui

Portugal Prime Minister hlui Antonio Guterres chu United Nations Secertary General thar a ni dawn ta a, nakkum January 10-ah Ban Ki-moon chu a thlak dawn a ni.

Kum 67 mi, Guterres hi engineer a ni a, kum 1976 khan politics luhchilhin, Portugal-in kum sawmnga zet dictatorship hnuaia an awm hnua democratic election neih hmasak berah a chuh a ni. Kum 1992-ah Socialist party hruiatu niin, 1995-ah prime mi≠nister atan thlan a ni.

Kum 2005-2015 inkar khan UN refugee agency, UNHCR hotu a ni a, he hna a chelh chhung hian Syria, Iraq leh Afghanistan-a tualchhung buaina nasa tak thleng avanga raltlan tam tak an buaipui a ni. Khawthlang ramte chu raltlante tana ṭanpuina tam zawk pe turin a ngen fo ṭhin.

Portugal President Anibal Cavaco Silva chuan Guterres chu regufee agency-ah hnuhma ropui tak a hnutchhiah tih sawiin, mi te zahkai a ni a, khawvel pawhin a thu a ngaichang a, UN hotu hna chelh tur pawh hian a awm hle tih kumtir lam khan a lo sawi tawh a ni.

UN hotu thar thlan turah hian a ṭum khatna atana hmeichhia dah emaw, he chanvo la chelh ngai lo, Eastern Europe lam candidate dah emaw duha campaign an awm a, mahse candidate zingah nominee tana Gutteres duhtu hi an tam ber tih UN Security Council chuan a puang ta a ni.

Member 15 awmna,UNSC hian Nilaini khan secret ballot hmangin UN Secretary General candidate 10 te chungchangah vote an thlak a, an zingah Gutteres duh lotu an awm lo. Member-te hian candidate tinte chu, ëencourageí, ëdiscourageí leh ënoí tiin duhthlanna pek an ni a, Portugal PM hlui hian ëencourageí vote 13 a hmu a, ngai≠dan nei lo pahnih an awm, duhlo tu ënoí vote a hmu tel lo.

UNSC chuan UN General Assembly-ah Secretary General atana Gutteres hi a nominate leh ang a, Assembly hian a lo pawmpui ve leh a ngai dawn a ni.