Thlipui tleh vangin Haiti VP thlan hun sawn

Thlipui, Hurricane Mathew tlehin Haiti ramah chhiatna nasa tak a thlen avangin Pathianni-a Vice president thlan tur pawh sawn a ni.

Haiti tuipui kam khaw hrang hrangte biakpawh theih an nih hnuin, thlipui tleh leh ruahsur nasa avanga chhiatna thleng vanga thi hi mi 339 an tling tawh a ni. Thi zinga a tam ber hi Haiti chhim thlang lam, Tiburon peninsula biala chengte an ni a, thingkung tluin mi tam tak a delhlum bakah, tuilian vanga thi eng emaw zat an awm bawk.

Darkar khatah km 235-a chakin Haiti ram hi a nuai avangin chenna in tam tak a chhiat bakah thingkung pawh a tlu nasa hle a, ranvulh tam tak an thi bawk. Mi sing tel chu hmun him lamah an tlanchhia.

Kum 2010 khan magnitude 7-a nain Haiti ramah hian lir a lo nghing tawh bawk a, he lirnghing hian an ram khawpui, Port-au-Prince a sawi chhe nasa hle a, mi nuai hnih vel an thi bawk a ni. Lirnghing hnu hian tui hri, cholera a leng zui leh a, mi 9,000 velin an thihpui a ni.

Pathianni-a Haiti vice president thlan tur chu an rama chhiatna nasa tak thleng avangin ṭhulh a nih thu Provisional Electoral Council president, Leopold Berlanger chuan a sawi a, inthlan ni tura ruat thar chu kar leh Nilaini-ah puan a ni ang, a ti. Thuneitute chuan inthlan buatsaih hma hian an rama chhiatna thlen dante enfiah phawt an tum thu an sawi.

Hurricane Matthew hian Haiti bakah Cuba leh Dominican Republic-ah pawh chhiatna nasa tak a thlen a, Ningani zan khan US Atlantic coast a thleng a, Florida-ah thlipui ruah nasa takin a sur zui bawk. Matthew thlipui hi kum sawm chuang chhunga US Atlantic caost-a thlipui tleh na ber a ni.

Thlipui tleh dawn vang hian US President Barack Obama chuan Florida, Georgia leh South Carolina-ah emergency a puang a, thlipui tlehna biala chengte leh an hmunhmate venna turin sorkarin hma a la nghal a ni.