Syria sorkarin Aleppo khua lak let a tiam

Syria President Bashar al-Assad chuan Islamic State (IS) firfiakten an ram chhunga khua an lak te chu lak let leh vek a tiam a, Aleppo khua pawh an la let leh ngei dawn tih a sawi.

TV-a an kawmnaah Syria President chuan he thu hi a sawi a, mahse firfiakte ram lak laklet tuma an beihnaah tualchhunga an kalphung angte hman a duh thu a sawi. Hei bakah hian rama hel awm zingah a ṭha lam leh ṭha lo lam an awm lo tih a sawi bawk. Syria sorkar hian Russia puihnain Aleppo lak let tum hian beihpui a thlak reng a, UN chuan he khuaa civil mi awmten chhawmdawlna an dawn theihna turin firfiak awmte chu khua aṭanga chhuak turin a ngen a, khawpui hi beih chhunzawm zel a nih chuan thla hnih velah chuan khawpui zahve vel zet chu a chhe vek thei dawn niin a tarlang.

UN chuan Aleppo khawchhak lama Syria sorkar leh helho inbeihna avang hian civil mi 275,000 vel an tangkhang mek niin a sawi. Mahse khawpuiin mamawh a chawkluhna kawngpui te chu sorkar sipaiten an lak avangin chhawmdawlna pawh thawn luh theih a ni lo tih a sawi.