Russia-in 'terror group' aṭangin Taliban paih

Russia Supreme chuan Afghanistan-a rorel lai, Taliban chu terrorist group aṭangin Ningani khan a paih. He pawl hi kum 20 chuang terror group zingah a lo dah tawh a ni.

Nikum khan Russia hian dan thar, official-a terrorist organization a puan tawh chu court-in a tih tawp theihna tur a siam a ni. Hemi hmang hian Prosecutor General Office chuan terrorist group aṭanga Taliban paih tura ngenna hi a thlen a, Supreme Court judge Oleg Nefyodov chuan court thutlukna hi a puang ta a ni. Russia hma hian Kazakhstan leh Kyrgyzstan ramte chuan terrorist group aṭangin Taliban hi an lo paih ve tawh bawk.

Taliban hian kum 2021 aṭang khan Afghanistan-ah hian a ṭum hnihna atan ro an rel a, an rorel hmasak anga khirh leh khauh taka kal an tum tawh lo tih an sawi hnu lawkah hmeichhiate khuahkhirhna khauh tak an siam zui leh ta tho a ni. Hmeichhiate chu zirna sang zawk an chhunzawm a khapsak bakah, hna tam zawk chu hmeichhiaten an thawh an phal lo a, pawn chhuah thlengin khuahkhirhna a siam zui bawk. Hei vang hian ram hrang hrangte sawisel leh dem an hlawh hle. Hmeichhiate hrekbehna a siam vang hian ram dang aṭanga chhawmdawlna an dawn thlengin a nghawng a ni. Hetih lai hian Taliban hruaitu zingah ram dang nena inpawhna ṭha siam a, ram dang puihna tam zawk an dawn theihna atana khuahkhirhna siamte tih tawp duh an awm tawh a ni.