Pakistan-in Afghanistan mi 10,000 chuang thawn haw

Pakistan chuan tun thla chhungin an rama Afghanistan mi awm 19,000 vel a thawn haw tawh niin United Nations chuan a tarlang.

Dan loa Afghanistan aṭanga an ram lut bakah, awm lailawk phalna pek tawhte pawh Pakistan hian thawn kir leh vek a tum a, heng mite hi tih luihna hmanga thawn haw an nih hmaa mahni duh thu ngeia haw turin April 30 thleng hun a pe a ni.Pakistan chuan an rama Afganistan mi lut tam lutuk an zo tawh lo niin a sawi.

Afghanistan-a rorellai, Taliban chuan Pakistan aṭang hian nitin chhungkaw 700 - 800 vel thawn kir an ni tih sawiin, mi maktaduai hnih vel thawn kir tur hi an awm dawn niin a sawi. Thawn kir zinga ṭhenkhat chuan an nu leh paten Afghanistan chhuahsana Pakistan an pan hnua Pakistan rama piang leh seilian an nih thute an sawi.

UN refugee agency in a tarlan danin, Pakistan-ah hian Afghan mi mtd 3.5 vel an awm mek a, heng zinga mi nuai 7 vel chu kum 2021-a Taliban-ten Afghanistan-a thuneihna an chan hnua tlanchhiate an ni. UN chuan tlanchhe zinga a zahve hi document mumal nei loa lut niin a sawi bawk.

Pakistan hian kum tam tak chhung chu Afghanistan indona avanga tlanchhiate hi a lo dawngsawng tawh ṭhin. Mahse sorkar chuan raltlan hi a pun chhoh tak zel avangin an ram himna thlengin a tiderthawng thei a, hei bakah public service lamah nghawng a neih tawh avangin an tuamhlawm reng thei tawh bik lo tih an sawi.

Inrinni liam ta khan Kabul-ah Pakistan foreign minister Ishaq DAr leh Taliban sorkara foreign minister Amir Khan Muttaqi te inbiain, Afghan mi thawn let tur chungchang hi an sawi dun a ni. Afghan mi thawn kirte hi sipai motor hmangin ramriah hruai an ni a, heta ṭang hian an awmna lailawk tura lo siamah dah a ni. Province hla deuha awmte chuan an khaw lama hruai haw turin ni rei tak tak helai hmunah hian an lo nghah a ngai ṭhin niin an sawi.