Myanmar helpawlin sipai kuta an khawpui lak hlan dawn

Myanmar helpawl pakhat, Myanmar National Democratic Alliance Army (MNDAA) chuan China hmalaknaa inremna an siam angin, an khawpui lak pakhat chu sipai sorkar kutah a hlan dawn tih China foreign ministry chuan a tarlang.

MNDAA hian nikum August thla khan Myanmar sipaite kut aṭangin China nena an insumdawn tawnna hmun pawimawh tak, Lashio khawpui an la a ni. Hei hi sipaiten kum 2021-a civil sorkar an paihthlak hnua helpawl kuta an thil chan nasat ber nia sawi a ni.

Mahse China foreign ministry thupuangtu, Guo Jiakun chuan MNDAA hian he khawpui hi sipaite kuta pek kir leh an remti tih a sawi. Sipai leh helpawlten an sawmna angin, China hian tun hnaiah Lashio-ah inkahhai puan dan tur ngaihtuahin monitoring team a tir a, he khawpui hi boruak ṭha tak hnuaia sipai kuta hlan turin an inrem thei ta niin a sawi. Lashio hi China ramri aṭanga km 100 vela hlaa awm a ni.

China hi Myanmar sipai sorkar thawhpui lian ber leh ralthuam supply tur a ni, hemi ruan an ramri bul hnaia chetla Myanmar helpawlte pawh inbiakna a neihpui reng bawk. MNDAA hian member 8,000 vel a nei nia sawi a ni.

MNDAA hian sipai kuta khawpui hlan tur chungchangah hian thuchhuah an nei hran lo a, mahse sipai lam chuan tun hnaiah Lashio-ah hian sipai officer ṭhenkhat chu dah luh an ni tawh niin a tarlang.