UK leh EU-in Brexit trade deal siam thei ta

United Kingdom leh European Union chuan thla eng emaw zat inremna siam tuma inbiakna an neih hnuah Ningani khan post-Brexit trade deal an siam thei ta. 

UK-in EU a chhuahsan hnuah transition period chu kumin December 31 hian a tawp dawn a, hemi hma ngei hian trade deal siam tum hian hma an la a ni. Ṭum eng emaw zat inbiakna an nei tawh a, mahse inremna siam thei loin an awm reng a, transition period tawpna tura kar khat chauh a awm tihah inremna hi an siam thei ta hram a ni. 

UK prime minister Boris Johnson chuan a twitter-ah 'Inremna siam a ni ta' tih hi Ningani khan a ziak a, a hnua TV-a thu a sawiah inremna an siam theih tak thu hi sawiin, 'trade deal an siam tawh zingah lian ber' a ni tih a sawi bawk. Hemi rual hian UK chuan a dan, border leh sangha manna tuipuia a thuneihnate chu a la kir leh ta a ni, a ti. Johnson chuan EU nena trade deal an siam hi pound tluklehdingawn 660 hu a ni tih a sawi. EU aṭangin inlahrang tawh mah se, EU chu an ṭhianṭha, thawhpui leh an thlawp reng tur a ni a sawi bawk. 

Insumdawn tawnna kawnga inremna an siam hmang hian UK leh EU member ram 27-te chu tariff/quota awm loin an insumdawn tawn chhunzawm thei zel dawn a ni.