Iran-a Port puak leh kangah mi 16 an thi

Iran-a sumdawnna lama lawng chawlh hmun lian, an ram chhim lama awm Shahid Rajaee Port chu Inrinni liam khan puakin a kang zui bawk. Kangmei chhuak vang hian mi 14 an thi a, mi 750 an hliam bawk.

Shahid Rajaee Port-a thil puak hi chhui mek a, customs office lam chuan chemical thil hlauhawm dan khawmna hmun aṭanga chhua a nih thu an sawi. Ṭhenkhat chuan thil puak hi sodium perchlorate, missile solid fuel siamna atana pawimawh tak niin an sawi bawk. A puak hi a nain a ring hle a,km 50 vela hlaah pawh a nghawr hi a hriat theih a ni. Port-a building awmte pawph an chhe nual bawk.Thli na tak a tleh bawk avangin kangmei chhuak pawh ṭhelh a harsat phah hle. Port puak leh kang vanga meikhu dum takin a bawh nasat avangin km 20 vela hla, Bandar Abbas-ah Pathianni khan school leh office te khar vek a ni.

Iran khawpui, Tehran chhim lam km 100 vela hla awm, Shahid Rajaee Port hi Iran rama container port changkang ber niin, khawvela oil phurtu lawng hmun ngaa ṭhena hmun khatin an paltlang, Strait of Hormuz bula awm a ni bawk.

Iran president Masoud Pezeshkian chuan port-a chhiatna thleng vanga thi chhungte leh hliam tuarte a tawrhpui thu a sawi a, he thil thlen dan hi chhui chiang tura thupek a tih chhuah nghal thu a sawi.

National Iranian Oil Products Distribution Company chuan port-a thil puak hi refinery, fuel tank, distribution complex leh oil pipeline te a nghawng buai lo tih sawiin, Bandar Abbas oil facility te pawh dan pangngaia hna an thawh theih thu a tarlang.