Pakistan-in Bangladesh nena inzawmna ṭha zawk siam tum

Pakistan firfiakten India rama Jammu and Kashmir hmuna pawikhawihna rapthlak tak an thlen avanga Pakistan leh India inkar chhe chho mek karah, Pakistan chuan Bangladesh nena inzawmna ṭha leh nghet zawk siam tumin hma a la mek.

Pakistan leh Bangladesh hian tun hnaiah kum 15 dawn hnua a vawi khatna Dhaka-ah foreign secretary-level Foreign Office Consultation (FOC)an nei. He hunah hian Pakistan alaite hi foreign secretary Amma Baloch chuan hoin, Bangladesh team hi foreign secreraty Jashim Uddin-a'n a ho a, thawhdunna tur hrang hrang sawiin a bikin insumdawn tawnna lam an thlurbing a ni.

Pakistan foreign minister Khawaja Muhammad Asif chuan Zirtawpni liam taa Bangladesh 54th National and Independence Day lawmna hmanpuiin, ram pahnihte inzawmna ṭha tak an neihte a tarlang. Economy, political leh cultural lamah thawhdunna zau leh ṭha zawk neih pawh an tum tih a tarlang.

Bangladesh sorkar leh mipuite duhsakna hlanin Asif chuan, "Bangladesh nena kan inlaichinna hi kan ngaihlu hle a, sector hrang hrangah inzawmna nghet zawk pawh kan neih kan duh a ni," a ti. Ram pahnih mipuite inkara thawhd hona ṭha leh hmasawnna a awm theihna tan inzawmna chak tak an neih a ṭul thute a sawi bawk.

Pakistan deputy prime minister leh foreign Ishaq Dar chuan nimina Bangladesh tlawh a lo tum tawh chu firfiakte pawikhawihna thlen vanga India nena an inkar boruak chhe mek avangin a sawn hla a ni.