Pope Francis vui liam a ni ta

Roman Catholic kohhran hotu, Pope Francis chu Inrinni, April 26, 2025 khan Vatican-a St Peter's Square-ah ropui taka vui liam a ni ta. Pope ruang hi Rome-a St. Mary Major Basilica-ah phum a ni.

April 21-a stroke vanga thi, Pope Francis vuina inkhawmah hian Catholic kohhran hruaitute bakah khawvel ram hrang hrang hruaitute an tel. A thlahna hunah hian hmun hrang hrang aṭangin mi sing tel an kalkhawm bawk. Vui a nih hma hian a ruang hi tlawh theih turin ni thum dah a ni a, hemi chhung hian mi nuai 2.5 chuangin an tlawh hman a ni.

Pope kuang hi thing leh zinc-a siam niin, a lo ngen tawh angin ruang hi Saint Francis altar bulah phum a ni. Mawlmang taka siam tura a lo tih tawh angin, a thlanah pawh hian a hming hi Latin ṭawngin, 'Franciscus' tih chiah ziah lan a ni bawk. Pope tam zawk hi St Peter's Basilica-ah phum an ni a, mahse Pope Francis hian a hmain St Mary Major Basilica-a phum a duh thu hi a lo sawi tawh a ni. He hmunah hian pope pasarih phum an ni tawh a, Pope Francis hmaa an phum hnuhnun ber chu kum 1669 daih tawhah niin, Clement IX an phum a ni.