NKorea-in Russia pui turin sipai a thawn tih sawichiang ta

North Korea chuan Russia-in Ukraine a do meknaah Russia pui turin a sipaite a thawn tih a vawi khatna atan a sawichiang ta.

South Korea leh khawthlang ramte chuan NKorea-in Ukraine do turin a sipaite a tirh ve thu hi a hmain an lo sawi tawh a, mahse NKorea hian hemi chungchang hi engmah a sawifiah lo a ni.

Nimin khan NKorea news agency, KCNA chuan an ram hotu, Kim Jong-un thupek angin an sipaite chuan Russia sipaite an puih thu a tarlang a ni. Hethu an sawi chhuah hma hian Russia chief of staff Valery Gerasimov chuan North Korea sipaite huaisenna chu a lo fak tawh bawk. Hei pawh hi Russia-in Ukraine an donaah NKorea sipaite an tel ve tih a sawichhuah vawi khatna a ni ve bawk. Gerasimov chuan Kursk bial chu Russia in a pumin a thunun tawh niin a sawi bawk a, Ukraine lamin an pha thung.

KCNA chuan an sipaite an tirhna chhan hi Russia leh NKorea in defence treatyban lo ziah tawh hmanga thutlukna siam a ni ti a sawi a, rorelna dik tungding tura beitute chu pasalṭha leh a ram tan mi chhuanawm tak a ni, tiin Kim chuan a sawi.

NKorea sipaite hi Kursk biala Russia sipaite pui tura thi an ni a, an mission an zawh hunah eng angin an awm zui zel dawn tih erawh an sawilang lo.