US leh Ukraine-in natural resources deal ziak

US leh Ukraine chuan hun eng emaw chen inbiakna an neih hnuah Nilaini khan Ukraine natural resources chungchangah inremna an ziak thei ta.

Inremna an ziah hmang hian US chuan Ukraine defence leh a ram economy din tharna kawngah puiin investment a ti dawn a, Ukraine-in mineral leh energy a hralh chhuahnaah US hian share a nei ve thung ang. Inremna hi US treasury secretary Scott Bessent leh Ukraine first deputy prime minister Yulia Svyrydenko ten Washington0ah a ziak a ni.

Ukraine hian mineral hrang hrang - graphite, titanium leh lithium ṭhahnem tak a nei nia hriat a ni. Hengte hi renewable energy, military technology leh infrastructure atana pawimawh a nih avangin ram hrang hrang mamawhna a sang hle a ni.

US Treasury chuan he inremna hian Ukraine ṭhanna turin a pui dawn a ni tiin, US-Ukraine Reconstruction Investment Fund pawh din nghal niin, ram pahnihte hian chanpual in ang, 50:50 an neih tur thu a sawi. Kum 2022-a Russia-in Ukraine a run hnuah, Russia beih lehna tura Ukraine sipai puitu lian ber chu US niin, ṭanpuina a pek hrang hrang hi USD tld 72 a tling tawh. Inremna an ziah hma pawh hian US president Donald Trump chuan heti khawpa an puihna avang hian eng emaw chu an pek let ve a ngai tih a lo sawi fo tawh bawk.

Ukraine economy minister Yulia Svyrydenko chuan he inremna hian mineral project pawimawh, oil leh gas bakah infrastructure lamah investment ṭha zawk a siam thei dawn a ni tiin, hei hian tualchhunga an ram chhunga thil siam chhuaktute pawh a pui dawn a ni, a ti.

US hian Ukraine hi mineral deal leh Russia nena an indona tih tawp a nih theihna turin a hranin inbiakna a neihpui a ni. Remna leh muanna a awmna tura rawtna a siamah kum 2014-a Russia-in Ukraine ram a lak lak leh a luah zui, Crimea chu Russia rama pawm mai rawt. Mahse Ukraine chuan hei hi an pawm thei dawn lo a, Ukraine ram danpui kalh a ni dawn tih a sawi.