UN-in Israeli settlement nena inzawmna nei Company 112 list tichhuak

United Nations human right office chuan Israel-in dan loa Palestinian ram a luahsak, West Bank-a Juda mite nena inzawmna nei nia sawi company 112-te list a tichhuak. 

UN body chuan heng company hming an tih­chhuah zinga 94 chu Israel rama mi niin, 18 chu ram dang paruk - US, France, Netherlands, Luxembourg, Thailand leh UK ami an nih tih a tarlang nghal bawk. 

List tihchhuah chung­changah Israel leh a ṭhian ṭha ram, US chuan thu­chhuah engmah an la nei lo a, mahse an sawisel ngei rin a ni. Hetih lai hian Palestinian lam chuan UN list tihchhuah chu lawmawm an tih thu an sawi thung a, Palestinian foreign minister Riyad al-Maliki chuan 'international law tan hnehna a ni' a ti. UN member ramte leh UN human rights council chu heng company-te hi West Bank-a an hnathawhte titawp nghal tura hriattirna siam turin a ngen zui bawk. 

Israel hian 1967-a Six Day War aṭang khan West Bank leh East Jerusalem hi a luah zui a, hei hi ramdangte an pawmpui ve lo a ni. A ram luaha Juda chenna tur a sak ṭhin pawh international law hnuaiah dan kalh nia sawiin, Israel leh Palestinian te inremna siam tumna daltuah an puh a ni. West Bank leh East Jerusalem-ah hian Israel mi nuai ruk vel an cheng mek a ni.