SKorea PM hlui Han-a'n President chuh a tum

South Korea prime minister hlui Han Duck-soo chuan June thlaa an ram President thlanna neih turah chuh a tum thu a sawi a, thlan tlin a nih chuan President thuneihna sang lutuk chu tih nep deuh a tum thu leh, tualchhung politics buaina awm reng chu chinfel a tum tih a sawi.

Nimina National Assembly-a press conference a neihah, Han chuan a ram hmangaih Korea tan eng nge a tih theih angte hai chhuah a tum dawn tih a sawi a ni. Martial law puan vanga president aṭanga Yoon Suk Yeol paihthlak a nih tak avangin June 3 hian South Korea chuan an president thar tur an thlang dawn a ni.

Han hi president paihthlak tak, Yoon-a hnuaiah prime minister a ni ṭhin a, hei bakah kum 2007-2008 chhung khan liberal president Roh Moo-hyun hnuaiah prime minister a lo ni tawh bawk. Trade minister, finance minister leh US-a SKorea ambassador hnate a lo chelh tawh bawk. Mipui aiawh tura thlan chhuah erawh a la ni lo. Political party-ah awmna a nei lo bawk.

South Korea President term hi kum nga a ni a, mahse Han hian thlan tlin a nih chuan an ram danpui ennawnin kum thum chung President dinhmun hi a chelh ang a, chumi hnuah chuan a bang dawn tih a sawi. SKorea President hian thuneihna sang tak a nei a, hei hi ram mipui zingah pawh siamṭhat leh thlak danglam duhna a lian tawh hle.