Israel cabinet-in Gaza-a zau zawka beihpui thlak remti

Israel prime minister Benjamin Netanyahu kaihhruai security cabinet chuan Gaza Strip-a Hamas firfiak pawl laka zau zawka beihpui thlak chhunzawmna tur a pawm.

Gaza-a huang zau zawka beihpui thlakna tur hian Israel sipai chuan reserve force sang tel chu ko letin, order pawh a ti chhuak niin army chief Lieutenant General Eyal Zamir chuan a sawi.

X-a video message a tih chhuahah, PM Netanyahu chuan Gaza indona kalpui zel dan tur chungchangah security cabinet meeting hi a ko tih sawi ni. Zamir pawhin Hamas te tudai tur leh, an mi hren mekte chhuah vek an nih theihna turin na zawkin an nawr zel dawn tih a sawi bawk.

Ruahmanna siam thar hnuaiah Israel sipaite hian Gaza-a beihpui an la thlak lohna hmunah te pawh beiin, Hamas infrastructure zawng zawng, lei hnuaia mite pawh an ti chhe vek dawn tih an sawi. Mahse he hmalakna hi kar leh lama US president Donald Trump-a'n Middle East tlawh a tum avangin hemi hma chu an la kalpui dawn lo nia sawi a ni.

Kumin January thla khan Israel leh Hamas-ten Gaza Strip-a inkahhai an puang a, mahse a thawh hnihna chhunzawmna tura an inbiak rem theih loh avangin thla hnih hnu, March 18 aṭangin an inbei chhunzawm leh a ni. Israel hian Gaza ram hmun thuma ṭhena hmun khat chu a thunun tawh a ni.