Myanmar lirnghingin a tih chhiatte then fai hna la thawk mek

Myanmar rama March 28-a magnitude 7.7-a naa lir nghingin thil a tih chhiatte then fai hna thawh chhunzawm zel a ni a, Mandalay-ah chuan 80% vel then fai ni tawhin, Sagaing-ah erawh 50% vel chauh an la thian fai tih state media chuan a tarlang.

Mandalay-ah lirnghing vanga kawngpui hnawhtu hrang hrangte chu thenfai fel tawh niin, motor leh kea veivak duhte tan pawh a him tawh niin an sawi.

Sagaing-ah pawh khawl lian hmangin in chim leh thil chhe dangte then mek a ni. In chim zingah hian Buddisht learning center bakah sakhaw hmun pawimawh dang pawh eng emaw zat a tel. Myanmar Rescue Team, Mandalay Region Fire Services Department leh Mandalay Region government chuan chhan chhuah leh then fai hna hi an la thawk chhunzawm zel.

Magnitude 7.7-a naa lirnghingin chhiatna a thlenah hian mi 3,800 dawn an thi a, hliam tuar 5,107 an awm bawk. Nimin thleng khan chin hriat loa awm hi mi 114 an la awm. Hetih lai hian in chimin a delh zinga mi 653 chu nungdama chhanchhuah an ni.

March 28-a magnitude 7.7-a naa lir a nghing hnuah a nghing nawn, afterschock hi vawi 157 a thleng a, a nat lam hi magnitude 2.8 aṭanga 7.5 te an ni.