Afghanistan-ah Taliban pali that

Afghanistan Air Force-te chuan western Farah province-a beihpui an thlaknaah Taliban firfiak pali an that niin nimin khan provincial gover­nor Mohammad Shouhib Sabit chuan a sawi.

Mohammad Shouhib Sabit chuan Nilaini zanah khan Air Force-te hian Farad province-a Pusht Rod district-ah beihpui an thlak tih sawiin, firfiakte lirthei an bitum ber a, lirtheia chuang firfiakte chu an thi tih a sawi.

Air Force lamin beih­pui an thlak hma hian firfiakte hian security force-te chu beih an tum hmasa a, hemi avang hian security force lam hian beihpui hi an thlak ta a ni.

Afghanistan security force-te leh Taliban-te hi tunhnaiah pawh an inbei ngun hle a, security force lam pawh hi eng emaw zat kumin chhung ringawt pawhin an thi tawh a ni. 

Thawhlehniah pawh khan Afghan khawpui Kabul-ah thihchilh bomb a puak a, mi paruk an thi. Thi zinga pahnih hi tualchhung mi an nih laiin pali hi sipai an ni thung. Midang 12 an hliam bawk.

Inrinni liam ta lawk pawh khan US-Afghan ṭangrualin beihpui an thlaknaah US sipai pa­hnih an thi bawk a ni.