Haiti-ah Hurricane Matthew vangin mi 900 thi

Thlipui na tak, Hurricane Matthew tleh vanga Haiti rama thi chu mi 900 dawn an tling a, thlipui hian Haiti chhim lam bial 90% a tichhia a, hmun tam tak chu tlawhpawh theih lohin an la awm niin official-te'n an sawi.

Kar kalta Thawhṭanni leh Thawhlehni khan Hurricane Matthew hian Haiti ram hi a nuai a, darkar khata km 230-a chakin a tleh a ni. Thlipui hian ruah a ken tel avangin thlipuiin a lenchhiat bakah ruahsur nasa leh tuilian avangin chhiatna nasa tak a thleng bawk.

Official-te chuan thlipui tleh vanga thi hi an hriat belh zel tih an sawi a, thlipuiin a nuai hmun ṭhenkhat chu helicopter hmang pawhin an la tlawh thei lo tih sawiin, mi 350,000 vel ṭanpui ngai an awm mek thu an sawi. Thlipui natna bialahte chuan power line a chhia a, phone hmang pawhin biak theih an la ni lo.

US chuan thlipui tuarte ṭanpui hna thawk tur hian Navy lawnglian, USS Mesa Verd a tir a, ei tur leh tui thianghlimte thlak turin silai helicopter pakua a tir tawh bawk.

Hurricane Matthew hian Haiti leh Cuba ramte a nuai hnuah kar kalta Ningani khan Bahamas nuaiin, Zirtawpni khan US a thleng a ni. Mahse US a thlen hnu hian Haiti ram ang chuan a tleh na tawh lo a, mahse President Barack Obama chuan na zawka la tleh thei reng a ni tih sawiin, thlipui kalkawnga awmte chu fimkhur turin a chah.