IS-te'n ram an hloh hnem

Islamic State (IS) firfiakte chuan Syria leh Iraq-a an ram lak hmun lia ṭhena hmun khat chu an hloh leh tawh niin data tihchhuah thar ber chuan a tarlang.

Security and defence analyst, IHS-in data a tihchhuahah chuan Syria leh Iraq security force-te nen an inbeih reng avangin IS firfiakte hian kum 2015, January thlaa an ram neih aṭanga 28% chu an chan tawh niin a sawi. IS te ram neih zau zawng hi, sq km 78,000 chu sq km 65,600 ah a tla thla tawh a ni.

Mahse tunhnai thla thum chhung≠in firfiakte ram hloh zat hi a tlahniam muang tawh a, hei hi Russia-in IS laka beihpui a thlak a tihnep deuh tak vang nia rin a ni.

IS te hi Turkey ramri aṭanga km 10-ah um kir an ni leh tawh a, Iraq sipaite chuan IS kuta awm, Mosul chhim lam km 60 vela hlaa hmun pawimawh, Qayyarah Airbase pawh an la let tawh bawk. Turkey ramri bula Syria khawpui, Manbij leh a chhehvel bial chu US thlawp Kurdish leh Arab fighter-ten August thla khan an la let tawh bawk a ni.

IHS Conflict Monitor-a an hotu, Columb Strack chuan Turkey kalpawhna kawngpuite IS kut aṭanga lakkir a nih tak avangin firfiakte hian mi thar lakluhna kawngah harsatna an tawh phah a ni, a ti. Iraq sipaite chua kum 2014-a firfiakten an lak, Mosul khawpui lak let leh tumin tun thla tawp lam hian beihpui an thlak leh ang.