Ethiopia-ah emergency puang

Ethiopia rama hnam lian pahnihten hun rei tak chhung sorkar laka lungawi lohna lantira nawrh an huaihawt tawh vangin sorkar chuan ram pumah emergency a puang.

Nawrh huaihawtute hi Oromo leh Amhara hnam niin, hnam pahnihte hi Ethiopia ram puma mihring awm aṭanga 60% an tling pha a ni. An ram rorelna leh thuneihna chu hnam tlem zawk, Tigrean-te kutah a awm tiin an lungawi lo a ni.

Pathianni hmasa khan Oromo festival neihnaah mipui lungawi lo leh police te inkarah buaina a chhuak a, mi 55 an thi. Hemi hnu hian buaina hi a punlun chho zel a ni. Police-te chuan nawrh huaihawt zinga mi, mi sangkhat chuang zet an man tawh.

Ethiopia Prime Minister Hailemariam Desalegn-a chuan Pathianni khan TV-a thu a sawiah, an ram mipuite himna an ngaih pawimawh avangin emergency an puang tih a sawi. Hei bakah hian nawrh huaihawtten infrastructure project, education institution, health centre, admi≠nistration leh justice building an beih ṭhinte chu tihtawp an duh tih a sawi.

Emergency hi thla ruk chhung atana puan a ni a, a ṭul dan a zira pawhsei theih a nih thu PM chuan a sawi bawk.

Nawrh huaihawtte hian foreign company-te pawh an bei tel a, hei hian an ram economy lam thleng nghawng
ṭha lo a neih a hlauhthawn thu Desalegn-a chuan a sawi. Ethiopia khawpui, Addis Ababa kalpawhna kawngpui eng emaw zat chu nawrh huaihawtte hian an dang a ni.