Trump leh Clinton-te'n debate vawi hnihna nei

US President candidate pahnih, Donald Trump leh Hillary Clinton-te chuan an ram huna Pathianni zanah khan presidential debate ṭum hnihna an nei, debate hi ṭum khat dang an a la nei leh ang.

Candidate-te hi ṭawngkamin an inbei na leh hle a, Republican candidate Donald Trump chuan President ni se chuan a khingpui, Democratic party candidate Hillary Clinton-i chu Secretary of State a nih laia official thila a private email a hman avangin jail-ah a tantir tur thu a sawi.

Kum 2005 kuma TV interview-a hmeichhe chungchang mawi lo taka a sawi, 'mi lar chuan hmeichhia tu chungah engpawh a ti thei ang' tia a sawi vawrh lar thar leh chungchangah, Trump chuan ṭawngkam chauhin a sawi a, mahse Hillary Clinton-i pasal, president hlui Bill Cliton chuan a takin a lantir thung a ni, a ti. Bill Clinton-a anga hmei≠chhiate chunga inluling chu an ram politics chanchinah an la awm lo niin a sawi. A thu lo sawi dan vang chuan a inchhir thu sawiin, hmeichhiate chu a zah hle tih a sawi lang bawk.

Clinton-i chuan video-a Trump-a thusawi ngaithla tawh chuan, Trump chu eng ang mi chiah nge a nih tih an hrechiang tawh hle tih sawiin, campaign chhung pawhin a nihna dik tak hi an hmu a ni, a ti. Pem lutte, African American, Latino, rualban lo, Muslim leh midangte a bitum fo avangin Trump chu Oval Office luah tura rinngam tlak a ni, a lo ti bawk. State Department a enkawl laia email bo ṭhenkhat haichhuak tura Trump-a'n Russia a sawm chu na takin a sawisel bawk a, President thlanna neih turah Donald Trump a tlin theih nan Russia chuan inrawlh dan an zawng a ni, a ti.