Khawvel Lawrkhawm

Bangladesh ramri-ah Myanmar police pakua kaphlum

Bangladesh ramri-ah police post chu Pathianni zing khan helhoin beiin, Myanmar police pakua an kaphlum.

Eng pawl mahin police-te kaphlumtu an nih thu hi an sawi lo a, mahse official-te chuan Muslim Rohingya helpawl te niin an puh thung.

Pathianni zing dar 1.30 vel khan Rakhine state khawthlang lam, Maungdaw bula border post pathum chu helho hian an bei a ni. Helhoin an beihnaah hian police pakua an thih bakah, mi dang pali-in hliam an tuar. Border post beitu hel pariatte pawh kahhlum an ni a, an ralthuam hman eng emaw zat man sak an ni bawk.

Israel-in Negev nuclear site Shimon Peres hming put tir dawn

Israel sorkar chuan Negev thlalera nuclear site chu Prime Minister boral ta, Shimon Peres-a hming an puttir dawn.

Prime Minister Benjamin Netanyahu chuan Pathianni-a cabinet meeting neihah he thu hi a sawi a, Nucelar Research Center-Negev tih chu Shimon Peres-a hming chawi hian thlak a ni dawn tih a sawi. Peres-hi kum 1950 leh 1960 chhoa Dimona-a a ruka nuclear facility siam kawnga mi pawimawh tak a ni. Israel hian nuclear ralthuam a neih leh neih loh a sawichiang ngai lo.

Thailand lal dinhmun a tha lo

Hun rei tak a dam loh avanga enkawl tawh, Thailand lal King Bhumibol Adulyadej-a chu a dinhmun a ṭha lo hle. King Bhumibol hi khawvel ram khat lal nihna dinhmun chelh rei ber nilai a ni.

Royal Household Bureau chuan kum 88 mi, King Bhumibol hi damdawi pek a nih hnuah ventilator hmanga thawk tir a nih thu a sawi. Medical team chuan uluk takin an vil reng a, mahse a dinhmun chu a la ṭha lutuk lo niin a sawi. Kum hnih kalta aṭang khan Khing Bhumibol hi natna hrang hrang avangin enkawl reng a ni a, mipui hmunah a inlan hnuhnun ber pawh kumin January 11-a Bangkok-a palace a tlawh ṭum kha a ni.