Khawvel Lawrkhawm

Asia-a Zika virus a darh an ring

World Health Organization (WHO) chuan thosi seh aṭanga kai theih, Zika virus chu Asia khawmuala ram hrang hrangah a darh a rinawm niin a sawi.

Singpore-ah chuan Zika hri vei hi mi 100 chuang hmuh an ni tawh a, Thailand-ah Zika virus-in a thlen, nau piang thar zinga pianphung dik lo pahnih an awm tawh bawk. Zika hri vei hi khawvel ram hrang hrang 70 ah hmuh a ni tawh. WHO director Margaret Chan chuan mithiamten virus leng mek khuahkhirh dan hi an zawng mek tih a sawi.

Pakistan-in journalist zinchhuah a khap

Pakistan sorkar chuan Pakistan sorkar leh Pakistan army inkara inhriatthiam lohna awm nia Dawn chanchinbu-a ziaktu, journalist Cyril Almeida chu an ram chhuahsan a khap.

Chanchinbua a thuchhuah vang hian Almeida hi ëExit Control Listí ah dah a ni a, hei bakah hian Prime Minister Nawas Sharif-a chuan Dawn chanchinbua thuchhuah chu thu dik lo a nih thu sawiin, he thila mawhphurhna neite chungah action la turin thupek a siam nghal bawk. Almeida hian October 6-a Dawn chanchinbu chhuakah Pakistan sorkar chuan sipaite hnenah an ramri bula firfiak awmte lakah beihpui an thlak loh chuan khawvel ramdangte enhran an tawk ngei dawn tih a hrilh niin a sawi.

Myanmar-in Rakhine state-ah venhimna tikhauh

Myanmar chuan Bangladesh ramri bula police officer pakua thah an nih hnuah venhimna khauh zawka kalpui turin Rakhine state-ah sipai a dah lut.

Police beitute hi eng pawl nge tih hriat ni lo mah se, thuneitute chuan Muslim Rohingya helpawlte niin an ngai. Pathiannia police beitu mi pariatte chu kahhlum an ni a, mi pahnih man an ni bawk. Pawikhawihna thlen hnu hian Maungdaw khuaah mi panga aia tam punkhawm khapna dan hman nghal a ni a, zan lam curfew puan a ni bawk.