Colombia sorkar leh ENL helpawl inbe dawn

Colombia President, Nobel Peace Prize dawng tura thlan, Juan Manuel Santos leh an rama helpawl, National Liberation Army (ELN) chuan inremna siam tumin inbiakna an nei ṭan thuai dawn.

Member 2,000 nei, ELN aiawh leh Colombia President hi October 27 hian Ecuador khawpui, Quito-ah an inbe dawn a, inbiakna nei tur hiani Venezuela sorkar hmalaknain inremna an lo ziak tawh a ni.

ELN nena inbiakna an neih tur thu puan a nih hnua thu a sawiah, President Santos chuan an ram chu dinhmun harsa tak tak tawk reng mah se hma lam a pan zel tih a sawi a, ELN nen chuan inremna an siam theih ngei a beisei thu a sawi.

President Santos hian an rama helpawl lian ber leh hlun ber, kum 52 zet lo hel tawh, Revolutionary Armed Forces of Colombia (FARC) chu inremna a lo ziahpui tawh a, mahse an ram mipuite inremna an siam dan chu an pawmpui thei lo a ni. Santos chuan mipui duhthlanna chu a zahsak thu sawiin, FARC chu inbiakna neih ṭhatpui leh a tum tih a sawi. FARC helte inremna siampui tuma a hmalakna avang hian chawimawina sang, Nobel Peace Prize dawng tura thlan a ni.

Colombia ramah hian helte avanga hun rei tak tualchhung buaina an tawh avangin mi 260,000 chuang an thi tawh a, chin hriat lohin mi 45,000 an awm bawk. Mi maktaduai sarih dawn chu himna zawngin an tlanchhia a ni.

Helpawl lian pahnih, FARC leh ELN te hi kum 1964 aṭang khan an inbei reng a, FARC hi a lian zawk a, FARC member hmun lia ṭhena hmun khat vel chauh ELN hian a nei nia sawi a ni.