Germany Chancellor ni turin Merz-a'n thlawptu ngah tawk lo

Germany conservative hruaitu, Friedrich Merz chuan Chancellor ni tura an ram parliament, Bundestag-a Thawhlehnia vote lakah thlawptu ngai zat a hmu pha lo a, sorkar thar a siam thei rih lo. Ni 14 chhungin Bundestag-ah Merz emaw, mi dang emaw pawh ni se Chancellor thar tur hi thlan a ni leh ang.

Germany inthlanpuia hnehna changtu, Christian Democrat hruaitu, Friedrich hian seat 630 awmna, Bundestag-ah hian majority nei turin thlawptu 316 a neih a ngai a, mahse vote laknaah thlawptu 310 chauh a nei pha.

Chancellor thar thlang tur hian vote lak a ni leh dawn a, an ram danpuiah chuan vote lak theih chin hi bithliah siam a ni lo. Kum 1949 hnuah inthlana hnehna changtu, Parliament-a Chancellor thlannaa majority nei pha lo hi an la awm ngai lo. Thawhṭanni khan Social Democrat SPD nena thawk dun turin inremna siam mah se, Merz chuan majority a nei pha ta chuang lo a ni.

Inthlanpuia vote hmu hnem ber dawttu, far-right party Alternative for Germany hruaitu, Alice Weidel chuan Parliament-a vote laka Merz chak zo lo hian conservative leh SPD te thawhdunna siam ṭhat tawk loh zia a ti lang a ni, a ti.

Kum 69 mi, Merz hian majority nei thei se chuan president Frank-Walter Steinmeier hmuin, sorkar a siam theih thu a hrilh ang a, chancellor atan lak luh a ni mai dawn a ni. Mahse vote hmuh ngai zat a hmuh tak loh avangin eng angin hma a lak zel dawn a la sawichiang lo a, a ṭum hnihna atan Parliamaent-ah fiahna a hmachhawn leh dawn em tih hriat a la ni lo.