Bangladesh PM hlui Zia an ramah kir

Bangladesh prime minister hlui, Bangladesh Nationalist Party (BNP) chairperson Khaleda Zia chu thla li chhung London-a a damlo enkawl a nih hnuin nimin khan an ramah a kir.

Khaleda Zia hi January 8 khan London panin, The London Clinic-ah enkawl a ni. Clinic aṭanga chhuah tir a nih hnuah a fapa upa ber, Tarique Rahman inah khawsain enkawl chhunzawm a ni. Nimin khan Qatari royal air ambulance hmangin Khaleda hi hruai haw a ni tih BNP Media Cell member Sayrul Kabir Khan chuan a sawi.

Kum 79 mi, Zia hi ṭum thum Bangladesh prime minister a lo ni tawh a ni. Mahse hun eng emaw chen aṭangin a hriselna a ṭha lo chho hle a; liver cirrhosis, kidney disease, heart problems, diabetes, leh arthritis te a nei a, London-a enkawl a nih hnuah a ziaawm chho hle niin an sawi.

Zia hi kum 2018 kha Dhaka court chuan Zia Charitable Trust eiruk thubuaiah thiam loh a chantir a, kum sarih lung-in tang tur leh Taka mtd 1 chawi turin a hrem. Hemi kum February 8 khan Old Dhaka Central Jail-ah tan tir a ni. Covid-19 hripui len lai khan Sheikh Hasina kaihhruai sorkar chuan Zia hi ni 776 hnuah jail aṭangin a chhuak lailawk a, kum 2020 March 25 khan a tan hmabak turte chu tih tawp a ni a, mahse a in leh an ram chhuahsan lo tura tih a ni thung. Hasina kaihhruai sorkar paihthlak a nih hnuah, nikum August 6 khan president Mohammad Shahabuddin chuan Zia hi a chhuah zalen ta a ni. Kumin March thla khan Bangladesh Supreme Court chuan Zia Orphanage Trust leh Zia Charitable Trust thubuai pahnihah thiam a chantir leh bawk.