France ramin July thla laihawl thleng Punkhawmna buatsaih a khap
France ram chuan hri leng vanga an rama lockdown puan chu thla khat chhung pawtsei lehin, May 11 thleng hman chhunzawm a ni dawn. Hei bakah hian July thla laihawl thleng punkhawm lam chi buatsaih khap a ni bawk.
Ram ṭhenkhat chuan an rama hri leng hian khuahkhirhna an siamte an thlah dul ṭan a, Spain pawhin lockdown chu a thlahdul ṭan a, Austria-ah pawh thla khat chhung lockdown hman a nih hnuah nimin aṭang dawr ṭhenkhat hawn a ni bawk. US-a hri leng tuar nasa ber, New York state governor pawhin an state chuan hri leng vanglai an pel tawh niin a sawi. Italy pawhin May 3 thleng lockdown pawtsei mah se, nimin aṭang khan dawr ṭhenkhatte an hawn tir ṭan a ni. Italy hi US dawta hri leng tuar nasa ber ram niin, hri vanga thi hi 20,000 an chuang tawh. Mahse an dinhmun hian ziaawm lam a pan ṭan a ni.
Mahse France chuan March 17-a lockdown a lo puan tawh chu pawhsei chhunzawm zel a tum thung. May 11-ah zirna in leh sumdawnna hmunte pawh a tahtawla hawn chhoh a ni ang. TV-a thu a sawinaah, president Emmanuel Macron chuan hri leng chuan hluar lam pan tawh loa a lan thu leh, beiseina sang tak nen hma lam hun an thlir thu a sawi. President chuan, "May 11 hi bung thar kan ṭanna tur a ni a, kan result a zirin khuahkhirhna dan hmante pawh siam rem zel a ni ang, " a ti.
France ramah hian Thawhṭanni thleng khan hri vanga thi hi la pung mah se, kar liam ta nena khaikhin chuan thi zat hi an tlahniam tawh a ni.