A thawh hnihnaah Germany Chancellor atan Merz thlang tling

Germany conservative hruaitu, Friedrich Merz chu Parliament-ah a thawh hnihna atana vote lakah thlawptu a ngah tawk ta a, Germany Chancellor thar atan thlan tlin a ni ta.

Germany inthlanpuiah Merz kaihhruai Christian Democratic Union (CDU)/CSU ṭangrual pawl chu chak mah se majority an nei pha lo. Thawhṭannia Parliament-ah vote lakah pawh Merz hian majority a hmu pha lo a ni. Mahse Thawhlehnia vote an lak nawn lehah,centre-left Social Democratic Party (SPD) thawhpuiin parliament lower house, Bundestag-ah seat 630 aṭangin vote 325 a hmu thei ta a ni. Majority nei tur hian vote 316 hmuh phak a ngai a, mahse vote lak hmasa zawkah Merz hian 310 chauh a hmu thei a ni.

Bundestag-ah vote lak a nih hnuah Germany president Frank-Walter Steinmeier chuan nimin khan kum 69 mi, Friedrich Merz hi Germany Chancellor 10-na turin a ruat nghal a ni. President chuan duhsakna hlanin, a hna thawhna tura hlawhtlinna ṭha tak a neih chhoh a beisei thu a sawi.

Chancellor Merz chuan an ram econony siamṭhat a, Europe-a Germany dinhmun chu pawimawh taka siam chhoh a tiam. Hei bakah an rama dan loa pem lutte laka khauh zawka hma lak pawh a tum a ni. Merz hi sumdawnna lama tawnhriat nei ṭha tak ni mah se sorkarah hruaitu chanvo erawh a la chelh ngai lo. Merz kaihhruai sorkar tharah hian sorkar hmasa minister zinga pakhat, defence minister Boris Pistorius chauhin a dinhmun ngai a chelh zui dawn a, cabinet member dangte chu mi thar vek a ruat dawn a ni.