Pope thar thlang turin conclave nei ṭan ta

Roman Catholic kohhran hruaitu, Pope thar thlang turin cardinal rualte chuan nimin chawhnu aṭang khan Sistine Chapel-ah conclave an nei ṭan ta. Cardinal, kum 80 hnuai lamte chuan member tld 1.4 awmna, Roman Catholic kohhran hruaitu thar tur hi an thlang dawn a ni.

April thlaa boral, Pope Francis thlaktu tur thlanna hian eng chen nge a awh dawn sawi lawk theih a ni lo. Tun ṭuma pope thar thlang thei tur cardinal 133 te hi ram 70 ami an ni. Conclave neih hma, Thawhlehni zing khan a tawpna atan inhmukhawmin, hemi hnu hian an awmna tur Casa Santa Maria-ah an lut. An mobile phone te pawh an theh lut vek a, pope thar an thlan theih hma chu pawn lam mite biakpawh leh tlawhpawh theih lohin an inkhung ang. An kalchhuah chhun pawh guesthouse leh Sistine Chapel inkar chauh niin, bus in hruai zel an ni ang. Pope thlangtu cardinal te bakah anmahni puitu Vatican staff te bakah, ei siamtu, hmun tifai leh driver te thleng pawhin pawn lam mite hnenah engmah sawi lo turin thu tiam an la vek a ni.

Pope thar thlangin nitin zing leh chawhnu lamah vote thlak ṭhin a ni dawn a, vote lak zawh apiangin Sistine Chapel chimney-ah meikhu tih chhuah ṭhin a ni ang. Meikhu dum a chhuah chuan pope an la thlang fel thei lo tihna a ni ang a, an thlan fel hunah meikhu var a chhuak ang. Pope thar tur hian vote hmun thuma ṭhena hmun hnih a hmuh a ngai dawn a, hei vang hian awlsam taka thlan tlin mai chu a harsat a rinawm.

Cardinal-te hian ni khata vote hi ṭum hnih, zing leh chawhnu lamah an thlak ṭhin dawn a ni. Ni thum chhung vote an thlak hnua thlan tlin an la neih loh chuan ni khat an chawl ang a, a tuk aṭangin an thlak chhunzawm leh nghal ang.