Covid-19 hi swine flu aiin a let 10-in a hlauhawm zawk : WHO
World Health Organisation (WHO) chuan hripui leng mek, Covid-19 chu kum 2009-2010-a khawvela hri leng, swine flu aiin a let 10-in a hlauhawm zawk tih a sawi.
WHO chief Tedros Adhanom Ghebreyesus chuan Geneva aṭanga virtual briefing a neihnaah he thu hi sawiin, khawvela hri darh dante hi an zirchian reng thu a sawi.
"Covid-19 hi a darh chak em em tih kan hria; swine flu, H1N1 tih bawk, kum 2009-a khawvela hri leng vanga mi 18,500-in an thihpui ai khan a let 10-in a hlauhawm zawk a ni," tiin a sawi. Kum 2009, June thla khan WHO chuan swine flu chu khawvel puma hri lengah a puang a, kum 2010 August thla kha hri leng hi a tawp nia ngaih a ni.
Covid-19 vanga ram hrang hrangte'n khuahkhirhna an siamte an hlih hma chuan hri leng thawh hnihna a thlen a hlauhthawnawm hle tih Ghebreyesus chuan a sawi bawk.
Khuahkhirhna hlih a nih pawhin a tahtawla muangchanga hlih leh, ruahmanna fel tak siam a ngaih thu a sawi. Covid-19 vaccine a awm hma chuan theihtawpa invenna kalpui chhunzawm zel a ngai a, vaccine chauhin hri leng tur hi a veng thei dawn tih a sawi. Ram hrang hrangin vaccine siam tum hian hma an la mek a, mahse kum khat hnu velah chauh hman theih an nih rin a ni thung.