FARC nena inremna duhten kawng zawh

Colombia sorkar leh FARC helpawlten inremna an siam thlawptuten chuan Nilaini khan Bogota-ah kawng an zawh a, tel an ṭhahnem hle.

September thlaa Colombia sorkar leh FARC-te'n inremna thuthlung an ziah chu ram mipuite ngaihdan lak a nih hnuin hnawl a ni a, mahse President Juan Manuel Santos chuan eptu pawl leh FARC aiawhte be lehin, inremna an lo ziah tawh siamṭhat dan kawng a zawng mek a ni.

Sorkar leh FARC helten inremna an ziah hnawl a nih hnuah inremna thlawptu mipuiten kawngzawh an huaihawt ṭum hnihna a ni. Kawngzawhnaah hian zirlai bakah hun rei tak tualchhung buaina thleng tawh avanga tuartu chhungte pawh an tel a ni.

President Santos leh FARC hruiatuten September 28-a inrema thuthlung an ziahah khan FARC hruaitute chu politics-ah an luh phalsak a ni a, Congress member an nih phalsak an nih bakah, an pualin seat 10 dahsak remtih a ni bawk. Hei bakah hian hel inpe, an tihsual inpuang te chu jail-ah dah loin, vantlang hna thawh tir an ni bawk ang. Hei hi eptu pawl lam chuan an duh lo a, helte hremna na zawk hi siamsak an phut.

FARC hotu, Timochenko pawhin inremna siam a, an ram tualchhung buaina tihtawp chu an duh tih a sawi a, inremna an lo ziah tawh siamrem tura inbiakna nei turin pawhin an inhawng reng tih a sawi.