Aleppo mayor-in khawthlang ramte dem

Syria-a Aleppo khaw mayor chuan Syria sipai leh Russia sipaiten khawpui chhunga beihpui an thlak reng dang zo loah khawthlang ramte a puh a, a dem thu a sawi bawk.

UN chuan Aleppo-a helte lakah Syria sorkar-in beihpui a thlak chhunzawm reng a nih chuan kumin Krismas hmain khawpui a chhe vek thei dawn niin a lo sawilang tawh a ni.

Mayor Brita Haj Hassan chuan an khuaa pawikhawihna nasa tak thleng mekah khawthlang ramte pawh mawhphurhna neia an ngaih thu a sawi a, "Aleppo-ah hian insuatna a thleng mek a, kan khawpui hal chhiat mek lai chu khawthlang ramte chuan engmah ti loin an lo thlir ringawt a ni", a ti.

Helho kuta awm mek. Aleppo khaw chhunga bazar hmunpui ber chu Nilaini khan thlawhtheihna hmanga beih a ni leh a, in eng emaw zat a chhiat bakah mi 15 an thi. Thawhlehni khan Russia thlawhtheihnate chuan Aleppo khawchhak lam hi ṭum eng emaw zat an bomb bawk a, mi 41 an thi niin Syrian Civil Defence chuan a tarlang.

Britain-a hmunpui nei, Syrian Observatory for Human Rights chuan September 19-a US leh Russian hmalaknaa inkahhai an puan a tawp hnua Aleppo-ah inbeihna thlengah hian mi 358 an thi tawh niin a sawi.